Музичка импровизација што патува: Костов и Гинтер со незаборавен „Times of Turbulence“ во Филхармонија
Во малата сала на Македонската филхармонија, Гете-институт Скопје донесе концерт кој ретко се случува на локалната сцена… Средба на два уметнички света што зборуваат ист јазик преку различни инструменти. Дуото Јордан Костов (акордеон, Македонија) и Андреас Гинтер (пијано и саксофон, Германија) ја претставија програмата „Times of Turbulence“. Проект чија моќ лежи во слободата, импровизацијата и културниот дијалог.
Соработката меѓу Костов и Гинтер започна во Шангај. Во градот што знае да ги спои патиштата на уметниците од целиот свет. Од таа прва средба до денес, нивната музика помина низ Кина, Јапонија… Низ Германија, Босна и Македонија, градејќи препознатлива естетика која е храбра, отворена и длабоко човечна.
На концертот во Филхармонија, оваа енергија беше јасно присутна.
Импровизацијата не беше техника, туку јазик на доверба. Акордеонот на Костов и пијаното и саксофонот на Гинтер влегоа во постојан разговор: час тивки и медитативни… Час остри и турбулентни, како звук што ја следи динамиката на нашиот современ свет.
Програмата „Times of Turbulence“ е инспирирана од нивните патувања, средби и искуства, музика која носи траги од различни култури, но и потсетник дека уметноста може да остане интимна, топла и искрена дури и во време на брзи промени.
„Акордеонот, пијаното и саксофонот се во постојан разговор создавајќи звук кој ја отсликува нашата современа турбулентност, но и можноста уметноста да ја смири,“ велат уметниците за својата програма.
Гете-институт и овојпат ја потврди својата посветеност на интеркултурната размена, отворајќи пространство во кое македонската и германската современа музика се сретнуваат природно и рамноправно.
ПР текст
