„Се инспириравме од јасминот и кринот“ – Тимот од Штип со детали околу креацијата за настанот „Креативен ден“
„Креативен ден“ е повеќе од само настан за промовирање на креации. Тоа е просторот каде што слободниот израз се прославува како суштински дел од живеењето. Инспиративните модели кои наскоро ќе бидат носени од познати и влијателни дами, ја претставуваат уникатноста и оригиналноста на дизајнерите. Во овој спој на мода и култура, облеката не е само естетика… Таа е моќен медиум за пренесување пораки и емоции. Разговараме со тимот кој доаѓа од Штип.
Страсна во својата работа, со одговорен пристап и некој посебен амбициозен шарм, Лидија Ѓорѓиева е професорот и модниот дизајнер на тимот од Штип кој едвај чекаме да блесне со својата креација на „Креативен ден“.
Разбуди се: Колку Македонија има модна визија и колку сме блиску до светските трендови, познатите брендови и дизајнерски имиња? Тешко ли е да се биде моден дизајнер во нашите простори?
Ние како народ сме доста креативни во повеќе сфери, па така и во модата. Морам да истакнам дека во последно време со забрзано темпо се движиме кон светските трендови – тоа е за почит. Да се биде моден дизајнер било каде е доста предизвикувачка професија, на нашите простори има можеби олеснителни околности поради помалата конкуренција.
Разбуди се: Лидија која е вашата инспирација за настанот? Како го создавате моделот. Кои се чекорите?
Овогодинешната тема ни даде можност да создаваме без ограничување… Со слободен ум, се разбира кога во прашање е убавина, нежност, чистота…. Нашата инспирација ни беа јасминот и кринот. Со нивната чиста мирисна нота потсетуваат на бајковита светлина. Сакавме овој дизајн да се претстави како здив од нежна приказна и неговиот раскош зборува за тоа.
Моделот го создадовме со сплотување на идеи и искуство. Поттикнати од убавината на цветниот мотив, конец по конец дојдовме до раскошна градина.
Симеона Томева е дел од тимот кој доаѓа од Штип. Таа е дамата која ќе ја носи креацијата на настанот. Со конкретна визија уште од мали нозе, креативна енергија што знае да редефинира граници, уникатна во секој поглед, па дури и во одговорите на нашите прашања… Околу нејзините гледишта ја запрашавме:
„Дајте и ги на жена вистинските чевли и ќе го освои светот“ – Мерлин Монро. Има ли вистина во ова? Колку е пресуден аутфитот, кодексот на облекување и стилот за успехот на една дама?
Иако умот е клучот за успехот, не смее да се запостави визуелната уметност на дамите. Можам да кажам дека не е пресуден аутфитот ама дефинитивно помага – како што има кажано Мерлин Монро во еден нејзин познат филм. Секоја дама мора да следи кодекс на однесување и притоа да не заборава да го додаде својот уникатен шарм и да го направи светот поубав со нејзиниот внатрешен и надворешен изглед, кои се огледуваат во нејзиниот стил.
Што значи настанот „Креативен ден“ за вас и вашата кариерна приказна? Како се вклопувате во овие „редови“ и која е поуката што сметате дека треба да се пренесе преку оваа идеја?
Креативен ден е одлика на многу поминати ноќи во будно сонување за тој момент. Ден за оживување на цртани дизајни, за споделување на богатството на креативните умови. Како инфлуенсерка и сопственичка на свој моден бренд, ова за мене е само дополнителен доказ дека трудот секогаш блеска. Уште од мала имав сон за сцена, работа со мода, камери и сега мојот сон се остварува. Посебно значење за мене има што сум дел од нашата креативна сцена бидејќи многу ценам креативни луѓе и секогаш имам желба за дружење, споделување идеи и следење на работата на колегите.
Kако поента сакам да истакнам дека треба да посегнеме по работа, а соништата ке почнат да доаѓаат. Треба да чекориме храбро, амбициозно и со тунелска визија кон целта.
Младоста е оној клучен момент, оној сторителниг на запишувањето на големиот серијал кој понатаму ќе го создаваме во нашите животи. па, кога сме кај младоста, креативноста и талентот, ја запрашавме и Моника Ристова, дел од тимот од Штип.
Моника колку ја следиш модата и трендовите? Дали според тебе како млад човек, треба да се заборави минатото и почетокот или никогаш не смееме да заборавиме од каде се почна? Бис е надоврзале на ова, дали треба слепо да се следат трендовите или како млада идна модна дизајнерка сметаш дека модните трендови се враќаат?
Kако студент на моден дизајн, доста се интересирам за модата и трендовите, тоа е моја пасија. Исто како и на сите полиња, така и во модата, нема дрво без корени. Никогаш не треба да се забораваат почетоците и целата историја баш од причина што тоа е еден круг кој се врти. Трендовите се враќаат и баш затоа треба да ги знаеме.
Што им треба на младите з да се поттикнат и да гледаат иднина во оваа професија?
Да знаат дека секој труд се наградува. Се што вистински сакаме може да оствариме со макотрпна работа. Соновите се остваруваат и затоа сметам дека кој и да има замислено иднина во оваа професија треба да си ја проба среќата.
ЗА ПОТСЕТУВАЊЕ „КРЕАТИВЕН ДЕН“ Е ИДЕЈА НА ПРОФЕСОРКИТЕ АНИТА СТЕФАНОВСКА, ЕМА ЌУКА И ЖИВКА ТАНУШЕВА ИЦАНОСКА ОД ТЕКСТИЛНАТА СТРУКА ВО СОУ „ТАКИ ДАСКАЛО” БИТОЛА И ВЕСНА БОЖИЛОВИЌ ОД ПРОДУКЦИЈАТА „БОЖИЛОВИЌ”. ,,PERWOLL RENEW”, СО ЗАДОВОЛСТВО СЕ ПРИКЛУЧИ НА ИДЕЈАТА. ВЕДНАШ ПОТОА И ДРУГИ БРЕНДОВИ КАКО ТРИТЕКС СО СВОЈОТ УНИКАТЕН ПРЕПОЗНАТЛИВ СЛОГАН „TRITEX UNDERWEAR-СИНОНИМ ЗА КВАЛИТЕТ“ ГО ПОДДРЖАА ОВОЈ ПРОЕКТ. СЕКАКО И „КРЕТИВЕН ДЕН“ СТРЕМИ КОН ПРЕТСТАВУВАЊЕ НА СЕТО ОНА ШТО Е КВАЛИТЕТНО. НА ТАЛЕНТОТ И УМЕТНОСТА ВО ФАНТАСТИЧНА СИМБИОЗА СО КУЛТУРАТА И МОДНИОТ ПУЛС НА ГРАДОТ.