Катарза, транс, незаборавна вибрација – Армин Ван Бурен ,,здрма” во Битола

Позитивна, незаборавна хипнотична атмосфера! Токму онаква каква што му прилега на една светски популарна ѕвезда – Армин Ван Бурен. Синоќа под битолското небо се случи вистински спектакл. Музичка еуфорија како што одамна не се памети.

Армин Ван Бурен е еден од најголемите диџеи на светската електронска сцена… А во градот на културата, музиката и уметноста, во Битола, ова легендарно име донесе посебна енергија. Ди џејот со препознатлив потпис, во свој крајно автентичен стил, ги спои транс музиката со визуелни ефекти и моќна сценографија што ја држеше публиката на нозе неколку часа. Вистински ролеркостер од возбудливи и транс емоции. Фантастична енергија и бура од адреналин го,, здрма” тлото на стадионот „Петар Милошевски“ во Битола.

Со катарзичен ентузијазам беа пречекани и момците Sempre Music. Со својот сет маестрално ја отворија вечерта и успеаја да ја раздвижат и загреат публиката.

Со овој незаборавен музички настан на стадионот „Петар Милошевски“, Битола впиша ново поглавје во својата историја. Прв пат угости музички артист од А-категорија, придружен со продукција што ги следи највисоките светски фестивалски стандарди.

Зад организацијата стоеше „Авалон продукција“ (Avalon International Booking), а настанот се одржа со поддршка од Општина Битола и културната манифестација Битолско културно лето — БИТ ФЕСТ.