Пред платото на Мал Битолски Монмартр, вечерва битолската чаршија ќе блесне во име на староградската музика.
Замислете само колку приказни има да раскажe калдрмата во битолската чаршија. Колку дуќани и излози знаат да зборуваат за нашата историја. Којунџиите раскажуваат како се ковала душата на Битољ… Кројачите уште ја чуваат свилата и најголемите тајни на одважните дами – битолчанки. Кондураџиите се уште зборуваат за нејзините совршени чевли и секогаш една „Пепелашка со скршена потпетица“. Уште се муабети оти ноќе споулавено се бара принцот низ дуќани… А можда и меани. На она место каде се пее, каде не запира музиката и младоста.
Чешмите уште течат на ова место, па и колку понекогаш да изгледа тажна приказната на битолската чаршија, животот продолжува, а водата е секогаш тука да ги измие солзите и се одново да започне.
Фото – Павлина Василевска
Кога врвиш низ чаршија уште се слуша звукот на гитара и таа мала и тивка серенада! Се слушаат поткованите чевлички на одважните дами. И муабетите на берберите, на бовчарите, јажарите. На леблебџиите и месарите. На ѕвончарите и кожарите. Се расплетуваат и откриваат приказните за бељот, ромбељот…Кој имал среќа во карти и меани, а кој во љубов.
..Има една посебна миризба во Битолската чаршија. Посебен однос кон животот дури ја газиш таа калдрма. Има една посебна мистерија „шо“ те трга и зауздува низ специфичен простор од кој излегуваш со некој мангал муабет. Одважен, кабадајски… Костумосан и со пикантен шмек на боемски мерак.
Вечер, во таа битолска чаршија, во нашата чаршија, започнува Фестивалот на староградска музика. 21 часот е моментот кога битолчани ќе уживаат во уште една еснафска и боемска приказна на маестралните Боеми. А приказната продолжува и во Сабота на 12ти со Група Ѓердан и Битолски Тамбураши.
Низ чаршија, низ звукот на меракот, чупите, виното и само една песна: „Ако одам во Битола. “