Самостојна изложба на Симона Мирчевска: En Plein Air – На Отворено
На 3 септември 2025 година, во Културниот Центар Магаза во Битола, беше отворена самостојната изложба на архитектот и визуелниот уметник Симона Мирчевска. Изложбата носи назив „En Plein Air: На Отворено“. Таа претставува апстрактни пејзажи од Пелистер. Делата се создадени ин ситу (на локација) – директно под отворено небо, во непосреден контакт со природата.
Самостојна изложба „En Plein Air: На Отворено“ не е само техника. Тоа е и начин на доживување на природата, каде што уметникот активно се поврзува со просторот околу него. Симона Мирчевска ја истражува природата на Пелистер како живо наследство и културен симбол. А пејзажот претставува повеќе од само географска локација. Во овие дела, пејзажот е емоционална и лична интерпретација, која го надминува вообичаеното гледање на природата и ја претвора во субјективно и духовно искуство.
Изложбата „En Plein Air: На Отворено“ ги прикажува пејзажите на Пелистер како визуелни одрази и емоционални пејзажи што го надминуваат реалното. Сликите претставуваат спој меѓу видливото и невидливото, историјата и културата на регионот, како и личната интерпретација на уметникот. Природата, како илустрација на овие аспекти, стана неодвојлива од уметничката визија.
Во оваа изложба, процесот на сликање не е само креативен акт. Истиот е перформанс, споделен миг помеѓу уметникот и публиката. Пелистер, со своите ридови, шуми и магли, станува место на контемплација и инспирација, повикувајќи ги гледачите да влезат во длабочината на неговата мистична убавина. Изложбата е поддржана од Министерството за култура и туризам на Република Северна Македонија како проект од национален интерес.
На Пелистер, уметноста не се случува само за природата. Таа се случува со неа… Како живо доживување. Како спој на човечката креативност и неоспорната сила на природата, каде секој потег на четката станува дијалог со пејзажот, а секоја боја ја пресликува емоцијата што природата ја буди во уметникот.
Фотографии: Наталија Ристевска
