Битола доби своја нова културна иницијатива. UTOPIA BOOK CLUB e првиот книжевен клуб во градот. Истиот ќе се собира еднаш месечно за да ја слави литературата преку дискусии, анализи и споделување на идеи.
Првата средба на овој книжевен клуб се одржа во UTOPIA Private Business Club кој е и основач на клубот. Книжевните ентузијасти имаа можност да се запознаат со концептот и да ги разменат своите први импресии.
Со клубот ќе раководи Јасмина Атанасова, писателка и љубител на литературата. А целта е да се создаде простор каде книгите не само што се читаат, туку и се доживуваат преку колективна дискусија.
„Литературата не е само индивидуално искуство – таа е мост што нè поврзува со други перспективи, култури и мислења. Книжевните клубови низ светот се пример за тоа како читањето станува интерактивен процес, а не само чин на тишина. Сакавме Битола да добие ваков простор. Простор каде љубителите на книгите ќе можат да се сретнат, разговараат и создаваат заедница што расте со секоја прочитана страница,“ изјави Јасмина Атанасова.
Првата книга што клубот ја избра за читање е „Црквичето“ од Владимир Костов. Членовите ќе се сретнат повторно за да ја дискутираат и да споделат свои впечатоци. Клубот ќе се состанува еднаш месечно. Селекцијата на книги за старт ја поддржа Book’s House од Битола, која активно ќе соработува со клубот за да овозможи квалитетен избор на литературни дела. Но, клубот е целосно отворен за сите издавачи и книжарници.
Со оваа иницијатива, Битола станува дел од светскиот тренд на книжевни клубови, потврдувајќи дека љубовта кон книгите може да биде не само интимна, туку и колективна, динамична и инспиративна.
