Дарија Крстевска со одличен старт на новата сезона – личен рекорд и подиум во Софија
Националната атлетска надеж Дарија Крстевска ја започна новата сезона со одлични резултати на Националното првенство во атлетика на Бугарија за атлетичари под 18 години, кое се одржа во Софија на 1 и 2 февруари.
Крстевска, која настапи вон конкуренција, постави личен рекорд на 1.500 метри со време 5:17.84, што ѝ донесе трето место. Покрај ова, таа учествуваше и во трката на 800 метри, каде со време 2:34.37 го освои петтото место.
Со овие резултати, атлетичарката на АК Олимп најавува уште една успешна сезона исполнета со рекорди и борба за нови подиуми.
„Пресреќна сум што сезоната ја започнувам со личен рекорд и добри пласмани. Ова е само почеток, продолжувам со посветена работа за уште подобри резултати во претстојните натпревари“, изјави Дарија Крстевска по натпреварот.
Од АК Олимп истакнуваат дека Крстевска останува еден од најсветлите атлетски таленти и дека клубот ќе продолжи да ја поддржува во нејзиниот развој и идни успеси.
