Оживувајќи различни урбани простори, денес млади луѓе менторирани од уметници, ги претворија ѕидивите во уметничко платно. Настанот е инспириран од говорот на омраза на битолските ѕидови и претставува Уметнички крик против говорот на омраза преку графити и цртежи.“– изјави Маја Ангеловска, програмска менаџерка во МКЦ – Битола.
Откриј, креирај и инспирирај на Битола Отворен Град 21-24 јуни 2023!
Познатиот полигон кој повеќе од две децении ја слави уметноста, музиката и волонтерството, започнува денес. Ова е 22 издание на меѓународниот арт фестивал и истото започнува од мигот кога сакаме омразата да ја претвориме во љубов. Преку говорот на уметноста, го заменуваме говорот на омраза, па така денес омразата на битолските ѕидови ќе биде избришана со нови графити и цртежи на неколку локации. Битола Отворен Град ќе заврши со големиот музички хепенинг во сабота вечер во Градскиот парк во Битола на кој ќе настапи белградското етаблирано трио Репетитор, доаѓа бендот Арумбо од Барселона и битолчаните Лусент.
Младински културен центар – Битола, кој стои позади овој фестивал го трансформира градот во сцени за визуелни уметности, за настап на млади нови бендови, а предвидена е и програма со електронска музика со домашни и странски ДЏ-и која започнува од зајдисонце пред првaта знаковна кафетерија кај нас „Улаф сте“ а завршува пред еден од историските објекти во Градскиот парк Битола – Соколана, кој досега не се користел за вакви настани. Покрај планираните бројни концерт и изложби на млади талентирани луѓе, волонтерството е алката по која сме препознати. Волонтерите се во центар на сите активности, на овој начин правиме поврзување помеѓу новите генерации и стилови.
„Битола Отворен Град ја одразува посветеноста на фестивалот за поттикнување на позитивна и инклузивна средина за сите, продолжувајќи ја мисијата да обединува локални и меѓународни таленти, поттикнувајќи меѓукултурна размена и промовирајќи го културниот дух на Битола“ – изјави Сашо Додовски, директор на МКЦ Битола.
Фестивалот е платформа за храбра и независна мисла и упорен застапник за промена на културните обрасци во градот, земјата и регионот.
„Големиот музички хепенинг е заштитен знак на фестивалот. Имаме одлична комбинација на 3 бендови од Барселона, Белград и Битола за потполно целовечерно уживање во урбаниот модерен звук. Концертот ќе биде во Градскиот парк во Битола во сабота 24 јуни, со почеток во 20.30 часот. Сите настани на фестивалот се на отворени и алтернативни простори, без наплаќање на влезници и достапни за сите љубители на урбаната култура. Битола е отворен град за сите“ – изјави Златко Талевски Извршен директор на МКЦ-Битола.
Фестивалот е во организација на МКЦ-Битола со поддршка на Министерството за култура, Општина Битола во рамките на БИТФЕСТ и спонзори и поддржувачи од бизнис секторот.
Младинскиот арт фестивал „Битола отворен град“ 22 години ја промовира урбаната култура во Битола, а Компанија СН Осигурителен брокер и оваа година со задоволство го поддржа фестивалот во организација на МКЦ Битола.
