„Ништо не прави Земјата да изгледа поголема од пријателите на далечина. Тие го прават растојанието.“ – Хенри Дејвид Торо (Носталгија, емоции – Промоција во „Разбуди се“ на нов музички проект: MACEDONIAN NOMAD – Aлек Agato.
Со Aлек сме пријатели одамна. Приказната ни започна во паркот кај сатот. Во Битола. Во таа андерграунд алтернативна сцена во која некогаш Битола знаеше да пулсира. Приказната ни продолжи во Скарлет, Висаж, долниот парк, на фонтана. Беше тоа време, ако се сеќавате, кога се делевме на „кремци“ и андерграунд… 🙂 Време кога во Битола во паркот кај сатот, имаше посебна енергија. Магија која ја создаваа и креираа уметници… Беше тоа крик на една младост за нешто многу повеќе. Време кога верувавме оти Битола ќе стане метропола, оти ќе остариме тука и тука ќе остани квалитетот. Беше тоа лудо време на уметност, на поезии, на проза, на музика од секаков жанр. Време на битови, забави, фристајл, на рап сцената… Бевме бунтовни млади луѓе…
Нашето пријателство продолжи преку „мрежа“. Се влечкав знам по интернет кафулиња и си пишевме меилови. Долги ко небаре „Војна и Мир“ да ја читаш. Ама знаев оти ќе прочита и знаеше оти читам. Штом тогаш издржавме со брат ми, ова ќе трае вечно. Aлек повторно е УСА, а нашето пријателство го овековечивме во кумство. Пишува откако знам за него, а неговите текстови се навистина брилијантни со посебна тематика што знае да разбуди некоја емотивна страна. Да реши проблем или да ве намести како мозаично парче од неговиот (понекогаш) автобиогравски ролеркостер.
Aлек Agato во интервју за „Разбуди се“.
Имено, го знаете како Agato, но овој пат се претставува како НОМАД. Повод за интервјуто е неговиот нов музички проект, а за него можеме да речеме дека е совршено парче и микс на емоции како спој од едно убаво време и овој денешен рапиден свет. Свет кој без никаква толерантност „те вози“ напред, но и покрај сѐ, му пркосиш. Албумот е брилијантен и ја користи АИ технологијата, раѓајќи извонреден глас кој Aлек го оживеа на сцена. За проектот и оваа извонредна приказна на Агато, прочитајте подолу во текстот.
Кој е Номад?
Номад не е само емигрант кој се иселил од нашата жална Македонија. Номад е секој од нас, кој бар на момент заминал со мисла на нешто недостижно. На нешто посакувано, но никогаш исполнето. Едно од тие работи беше и исполнет соло албум. Пасијата за пишење ја имам уште од многу мал… А најмногу ми „проработи мозокот“ во времето на БитолаКрУ кога за прв пат почнав да пишам свои рап текстови. Многу од тие текстови седат ден денес по фиоки и никогаш не виделе бел ден. Епа таа иста пасија не ме остава да спијам понекогаш, и станвам па се фаќам за мобилен да куцам текст. Еве 6 години од кога емигрирав во УСА, и почнав сѐ повеќе да се изразувам на англиски. Тој жар никогаш не згасна. Можда носталгијата „ме акна“ па почнав малце повеќе во последно да пишам, не знам…
Зошто Номад, а не Агато како што те знаеме?
Епа оти Агато нема студио кај да снима… Ама за среќа се разбира во компјутери, барата нови чуда шо се случуваат по светов на технологијава. Се решив за тоа име, оти не е еден артист, не е еден пејач. Номад е виртуелно креиран вокал кој го претставува секој од нас. Го претставува секое гласче шо го слушам кога размислувам, кога фантазирам, кога се сеќавам на спомени, кога сонувам за иднина. Ако се прашваш како бе виртуелен вокал, епа АИ е толку напреден шо дури и ме плаши.
Генерално глеано, иам два агли на сето ова: Прво – Со проектов Номад сакам да докажам дека пополека умира една ера. Ера на музичка креативност кога требаше да знаеш да свириш инструмент… Да имаш одличен вокал, одличен текст и аранжман. АИ и технологијата е толку напредна шо сите тие професии пополека ќе изумрат. Не знам дали си видела и слушнала за други напредни АИ кои прават реалистички видеа само базирани на звук или текст. Можеш да замислиш што значи ова за Холивуд и музичката индустрија? Збогум Др. Дре! Збогум продукцијо!
Второто гледиште е она кое мене ме мотивира. Ако си артистички настроен и имаш визија, имаш идеја ама неможиш поради Икс причини да ја оствариш, АИ целосно можи да ти помогни. АИ можи да ти дај идеја како да ја искомбинираш замислата и претвориш во целосен проект. Ако си добар сценограф, можеш да направиш филм, ако си добар текстописец, правиш песна. Ако си добар графички дизајнер, можеш да направиш 3Д анимација итн. Во овој момент, не постои АИ за артисти што не постои.
Извонреден албум, полн со емоции. А и од технички аспект, проектов е чиста десетка. Како го направи Номад? И зошто сите песни на Англиски?
Технологијата е напредна, ама не толку напредна за да знај Македонски Јазик. Од другата страна на англиски, можи да допри до многу повеќе уши. Тоа е причината зошто на англиски јазик. А како е креиран Номад, епа… Номад е комбинација од различни АИ со мој аранжман и мои авторски текстови. Еден АИ е користен за музика, друг АИ за вокали, трет АИ за комбинација од сите нив во една целина.
По просек правев 10+ верзии од секоја песна, се дур не се погоди сето тоа да испадни професионално. Звучи премногу реално и сите ме прашуваат „кој е раперов бе“?
Времеплов, љубов, изгубена младост… Барем ние така се доживеавме. Но, на што мисли точно авторот? На што се однесуваат и фокусираат твоите стихови? Која е тематиката, и инспирацијата? Како ја креираш приказната?
Епа како шо кажав погоре, Номад е секој еден од нас, секој глас кој го слушаме во себе си во текот на денот. Баш на тоа, текстовите опфаќаат теми од шо е то шо посакуваме а немаме, дали би можеле да го вратиме времето да се вратиме во детството… Дури и до мотивациони теми за луѓе кои патат од повремена депресија и тага.
Инспирацијата ми е од животот. Така да и главната песна носач на овај проект со која сѐ започна, е токму песната „Македонски Номад”. Таа е баш моја автобиографија, поделена на три строфи, животот во Македонија, Романија и УСА.
Омилена песна од проектот?
Сите, ама текст кој најмногу ме радува како легна на песна е Rising Up, и If I could.
Кои се плановите за иднина на Aлек?
Чекам повеќе Видео АИ, бесплатни пошо сме муфте народ, и планирам видео клипови за дел од истиве песни. Тоа не значи дека готово е…Секогаш кога ќе се има инспирација за текст, ќе се прави нова песна. Дур ме држи жаров ќе тлеам.
Каде можи да се слуша албумов?
Целосно е прикачен на Soundcloud.com. Само пребарајте Nomad, или Macedonian Nomad. Еве и премиерно промотивно можи да го слушните и тука: