Будни во Свет на Скролери: Што Ако Не Сме Ние Чудните, Туку Свестените? Во време на екрани, паузата е бунт. А бунтот — новата свест.” Некој ќе каже: „Што ти е, премногу размислуваш.“ Но јас велам: не размислуваме доволно. Додека милијарди палци танцуваат преку екрани, ние што паузираме, што гледаме во небо, во лице, во зборови без емоџиња и лајкови — ние стануваме статистичка грешка. И тоа ми се допаѓа.
Во свет каде што „најважното“ се случува во нотификации и лајкови, неочекувано е да одбереш тишина. Радикално е да не објавиш. И речиси револуционерно — да бидеш присутен.
Дигитални зомбиња со уредни профили
Сите сме виделе: блескави животи, филтрирани утрини, кафе со совршена пена. Но зад тие пиксели живеат луѓе што не се сеќаваат на вкусот на здодевноста, на звукот на чекори без музика во слушалки, на зборови што не се диктирани од алгоритми.
Ние не сме чудни. Ние сме малцинство што сè уште го чувствува пулсот на вистинското. Што може да седи без телефон. Што чита книга без да ја слика. Што се гледа во очи — не во екран.
Не станува збор за технологија. Станува збор за избор.
Можеш да го имаш најновиот телефон и сè уште да бидеш буден. Свеста не е апликација. Таа не се симнува — таа се гради. Со прашања. Со сомнежи. Со тишини.
Ако никогаш не си почувствувал(а) анксиозност кога остануваш сам(а) без Wi-Fi, честитам — си на патот кон внатрешна слобода.
Знаеш дека се будиш кога…
- Ти станува смешна трката за лајкови
- почнуваш да препознаваш себе си кога нема никој!
- Чувствуваш дека времето без екран не е изгубено, туку вратено!
- Не проверуваш вести – ги живееш!
- Го гледаш небото без причина!
Ова не е повик за исклучување. Ова е повик за вклучување. На умот. На срцето. На вистината. Зашто додека светот скрола, некој мора да го запише она што навистина се случува. Да го почувствува. Да го прераскаже.
И ако си еден/една од тие „чудни“ луѓе — добредојде во тивката револуција. Не носиме банери. Само присуство. Свесност. И зборови што траат подолго од сторито.
Да, не сме обични. Но можеби, конечно, сме будни.
пишува: Ромина Марковска
Извор на инспирација: (Според New York Post, се зголемува бројот на луѓе кои плаќаат илјадници долари за да учествуваат во дигитални детокс ретрити, каде што се одрекуваат од своите уреди за да се поврзат со себе и природата. Оваа тенденција покажува колку е силна потребата за одмор од постојаната поврзаност.)
