Ако нештото не можеш да го купиш со пари – ќе го купиш со МНОГУ пари.
Колумна за вредностите што секојдневно ги потценуваме
Пишува: Ромина Марковска
Ако нешто не можеш да го купиш со пари, животот ќе ти го наплати со многу повеќе. Можеби не со евра! Ќе ти го наплати со жалење, тишина или солзи.
Некој ќе рече – тоа е само поговорка. Друг ќе се насмее и ќе додаде: „Значи, сè е до парите“. Но ова не е за пари. Ова е за животот и за сето она што мислиме дека ќе трае засекогаш.
Понекогаш „нешто-то“ изгледа малку – едно прашање, еден повик, една шолја кафе со мајка ти. Но тие мали нешта се вистинските богатства.
Тие моменти не се рекламираат. Не ги има во акции, не ги добиваш со поени. Тие се таму – секогаш достапни, но невидливи за оние што секогаш брзаат. А кога ќе ги забележиш, веќе си богат – иако паричникот ти е празен.
Кога ќе заборавиш да ја прашаш мајка ти како си денес, ќе дојде ден кога ќе си зборуваш сам со нејзиниот стар шал.
Ќе сфатиш дека шолјата кафе што никогаш не ја испивте заедно ќе тежи повеќе од секој скап подарок. А тишината ќе стане гласна – премногу гласна.
Кога нема да го слушнеш пријателот кога ти вели „не сум баш добар“, подоцна ќе слушаш гласини – и ќе биде доцна.
Кога ќе одбереш молчење пред љубовта, подоцна ќе зборуваш со ѕидови.
И тогаш ќе се прашуваш – зошто ми беше тешко да кажам „те сакам“? Зошто молчев кога можев да се борам?
Ситните гестови се најевтиниот начин да останеме луѓе. А кога не ги „купуваме“ навреме, животот ни ги продава назад – поскапи, потешки, понекогаш и неподносливи.
Затоа, ако нешто-то не го дадеш денес од срце – утре можеби ќе го платиш со душа.
Никој не нè учи колку чини ненапишаното писмо, недадената прегратка, неискажаната грижа. Но животот ќе нè научи – без попуст.
Ако оваа тема ве допре, можеби ќе ви се допадне и оваа колумна: Зошто постоиш?
текстот го креираше: Ромина Марковска
извор на инспирација: Verywell Mind – The Little Things in Relationships That Matter the Most
