Во културниот центар ЛАБОРАТОРИУМ, се одржа промоцијата на книгата „Напластување“ од авторката Јасмина Атанасова – ново име во современата македонска книжевност.
Промотор беше поетот, писател и преведувач Тихомир Јанчовски, со силен и автентичен осврт на книгата, додека професорката Татјана Алексиќ испрати писмо, прочитано на самиот настан. Во него, книгата беше опишана како „проза напластена од галони љубов“, во која „се слушаат Бочели, Рамацоти и Квин“, и во која „ликот на Гвидо Гали се издигнува над отуѓеноста преку грижа, љубов и духовна преродба.“
„Напластување“ е егзистенцијална новела за самотијата, болката и повторното отворање кон животот. Главниот лик, Гвидо Гали, е пензиониран апотекар од Агридженто, човек што живее во тивка изолација сѐ додека не го пронајде сопствениот мотив преку грижата за младо момче – симбол на повторна смисла.
„Напластување“ е второ книжевно дело на Јасмина Атанасова, по нејзиниот дебитантски роман „Кога ќе стивне прашината“ (2023).
фотограф | Сашо Алушевски
